Prezident Shavkat Mirziyoyev 26-avgust kúni Qaraqalpaqstan Respublikası Joqarǵi Keńesiniń náwbetten tısqarı 34-sessiyasında qatnastı.
Prezidentimiz sońǵı 6 jılda region rawajlanıwına ayrıqsha itibar qarattı: Qaraqalpaqstandı rawajlandırıw boyınsha 31 párman hám qararlar qabıllandı, isbilermenlik subiektleri sanı 2 esege kóbeytildi, 4-5 mıńǵa jaqın investiciya joybarı iske túsirildi, Qaraqalpaqstandı ishimlik suwı menen támiyinlew 40 procentten 68 procentke kóbeytildi, mektepke shekemgi bilimlendiriw mekemelerine qamtıp alıw dárejesi 32 procentten 76 procentke, xalıq jan basına tuwrı keletuǵın dáramatlar eki esege ósti.
Jıynalısta Prezident Qaraqalpaqstanda qosımsha imtiyaz hám jeńillikler beriw boyınsha tiyisli ministrlik hám keńseler basshılarına tapsırmalar berdi.
Qarar joybarın tayarlaw tapsırıldı, oǵan kóre regionda tómendegiler qısqartıladı:
— dáramat salıǵı stavkası — 15 procentten 7,5 procentke;
— aylanba salıq stavkası —Nókis qalasında 4 procentten 2 procentke, rayonlarda 2 procentten 1 procentke hám shetki aymaqlarda 1 procentten 0,5 procentke;
— múlk hám jer salıǵı stavkaları —2 esege.
Bıyılǵı jılda shańaraqlıq isbilermenlik dástúrlerine rejelestirilgen 650 milliard sumǵa qosımsha ráwishte 200 milliard sum jóneltiriledi. Bunnan tısqarı, 2025-jılǵa shekem Qaraqalpaqstanda qosılǵan qun salıǵı (QQS) rejeden artıqsha jıynalǵan barlıq qarjılar respublika byudjetinde qaladı.
Awıl-xojalıǵındaǵı mashqalalardi sheshiw rejeleri:
— jıl aqırına shekem 6 mıń 620 gektar, kelesi jılda bolsa 6 mıń gektar paxta hám ǵálle maydanların qısqartıp, xalıqqa ijáraǵa beriwdi jolǵa qoyıw;
— egin egiw ushın fermerlerge 200 milliard sum, diyxanlarǵa 50 milliard sum qarjı ajıratıw;
—suw támiynatın jaqsılaw maqsetinde hár bir qudıqtı burǵılaw hám isletiw ushın 15 million sumǵa shekem subsidiya ajıratıw hám basqa finanslıq kómek beriw boyınsha tapsırmalar berildi.
Prezident Shavkat Mirziyoyev Qaraqalpaqstanda sanaat joybarların kóbeytiw boyınsha kishi basshılarǵa tómendegi tapsırmalardı berdi:
— Qaraqalpaqstanlı isbilermenlerge joybar hújjetlerin islep shıǵıw, subsidiyalar, kreditler hám kompensaciyalar alıw boyınsha biypul xızmetler kórsetiw, olardıń ónimleri óz bazarın tabıwda kómeklesiw maqsetinde investorlardı qollap-quwatlaw orayın shólkemlestiriw;
— Investorlardı qollap-quwatlaw orayı janında Nókis qalasında 10 gektar jer maydanında sanaat -texnologiyalıq park shólkemlestiriw;
— Kegeyli hám Xojeli rayonlarında jaslar sanaat hám isbilermenlik zonaların shólkemlestiriw;
– bes jıl múddetke (2027-jılǵa shekem) Qaraqalpaqstanlı isbilermenler aldına eksport ónimlerin islep shıǵarıw hám mámleketimiz aymaǵı boylap tasıw ushın satıp alınǵan shiyki zattıń transport qárejetleriniń 70 payızın qaplaw sistemasın jolǵa qoyıw wazıypası qoyıldı.
Mámleketimiz basshısı Qaraózekte mıs islep shıǵarıw, Qońıratta kaustik soda hám basqa ximiyalıq elementler islep shıǵaratuǵın jańa kárxanalar qurıw sıyaqlı iri joybarlardı qollap-quwatladı – dedi Prezident baspasóz xatkeri Sherzod Asadov.
Derek: Ózbekstan Respublikası Prezidenti Baspasóz xatkeriniń rásmiy kanalı