Tech4Impact mámleketlik emes, kommerciyalıq emes shólkemi tárepinen BMSH niń Demokratiya fondı járdeminde ótkerilgen “Ózbekstanda jasıl texnologiyalar tarawında hayal-qızlar startapların rawajlandırıwdı tezlestiriw” joybarı 2 oktyabr kúni Moynaq rayonıda isbilermen hayal-qızlar ushın seminar ótkerdi.
Qaraqalpaqstandaǵı hayal-qızlar biznes-joybarlarınıń startap-akseleratorları qatnasıwshıları ushın treningler ótkerildi. Treninglerde qatnasıwshılar 6 aylıq biznesti rawajlandırıw dástúri ushın saylanǵan isbilermen hayallar, sonıń menen birge, mentorlıq metodologiyası boyınsha onlayn treninglerden ótken, Nókis qalasınıń startaplar mentorları qatnastı.
Seminar dawamında tómendegi temalar talqılandı:
- qarıydarlardı úyrenip shıǵıw (Customer Development), bazardı úyreniw, básekileslerdi izertlew, maqsetli auditoriyanı úyreniw;
- MVP (ónimlerdiń minimal jumısshı versiyası, qarıydarlar menen sınap kóriw ushın prototipların jaratıw );
- turizm, awıl xojalıǵı, suwdı tazalaw, shıǵındılardı qayta islew tarawındaǵı innovaciyalar;
- qatnasıwshılar menen individual hám gruppalı mentorlıq sessiyaları.
Seminarlarǵa usınıs etilgen trenerler de qatnastı:
- Ozoda Ismoilova – UzAuto Motors Powertrain átirap-ortalıqtı qorǵaw boyınsha menejeri;
- Nora Rahimova – marketing, turizm, logistika tarawında27 jıldan artıq tájiriybege iye, startaplar mentorı;
- Akmal Salixov – VRonica kompaniyasınıń kreativ direktorı hám tiykarlawshısı, startaplar mentorı.
Seminar qatnasıwshıları óz joybarların islep shıǵıw jobaları menen bólisti, mentorlardan kelesi jumısları boyınsha tapsırmalar aldı. Startap-akselerator ushın 15 joybar tańlap alındı. Bular Moynaq rayonı hám Nókis qalasınan turizm, awıl xojalıǵı, suw máseleleri boyınsha startaplar bolıp esaplanadı. Barlıq joybarlar ekologiyalıq komponentke iye bolıwı kerek (biznestiń átirap-ortalıqqa tásirin minimallastırıw, suw, elektr energiyası hám basqa resurslardan paydalanıwdı kemeytiw, shıǵındılardı qayta islew hám basqalar ).
Seminar hám ushırasıwlardı shólkemlestiriwde jaqınnan járdem bergen, Balalar hám shańaraqlardı qollap-quwatlaw assotsiaciyası (Qaraqalpaqstan Respublikası aymaqlıq basqarması ), Jaslar isleri agentligi Qaraqalpaqstan Respublikası basqarmasına óz minnetdarlshılıǵımızdı bildiremiz.
Joybar haqqında : “Ózbekstanda jasıl texnologiyalar tarawında hayal-qızlar startapların rawajlandırıwdı tezlestiriw” joybarı 2 jılǵa mólsherlengen bolıp, Tech4Impact tárepinen Birlesken Milletler Shólkeminiń Demokratiya fondı járdeminde ámelge asırılıp atır. Joybar sheńberinde 2 jıl ishinde Nókis qalası hám Moynaq rayonında hayalları basshılıǵındaǵı 20 startap joybarı ushın akseleraciya dástúrin ótkeriw joybarlastırılǵan. Eń jaqsı 6 joybarǵa 2000 AQSh dolları muǵdarında qarjı kiritiledi.
Ilájdan foto- hám videoreportajlardı itibarıńızǵa usınamız:
