Búgin biz sizge Nókisli Juldız Abatbayevanıń qısqasha gúrrińin usınbaqshımız: akseleratorda ideyanı islep shıǵıwdan baslap AQShta biznes tájiriybesin almasıwǵa shekemgi bolǵan jol.
Juldız – óz shańaraqlıq biznesinde isleytuǵın isbilermen hayal, sonıń menen birge, medicinalıq ásbap -úskeneler jetkerip beretuǵın kompaniyanıń sawda menejeri hám Qaraqalpaqstandaǵı jasıl texnologiyalar tarawındaǵı isbilermen hayal-qızlar ushın startap-akseleratorımızdıń birinshi basqıshında finalǵa shekem barǵan qatnasıwshımız esaplanadı.
Juldız startap-akseleratorda arzan turar-jay hám átirap-ortalıqqa húrmet penen qaraytuǵın sayaxatshılar ushın Nókis qalasında “Eko Hostel” jaratıw ideyası ústinde isledi.
Erisilgen nátiyjelerden ruwxlanıp, ol jańa programmalarda qatnasıwdı dawam etti. 2022-jılda Juldız social isbilermenlik hám innovaciyalar menen shuǵıllanatuǵın qánigeler ushın mólsherlengen AQSh elshixanasınıń ” Uzbekistan Business Leaders” programmasında qatnasıw ushın tańlawdan ótti. Saylanǵan qatnasıwshılarǵa tájiriybe almasıw hám ilmiy tájriybelerin asırıw ushın 4 háptelik AQShqa sayaxat qılıw múmkinshiligi berildi. Juldız Ózbekstannan jetekshiler qatarına kiriwge eristi.
“Kelgennen keyin, biz shtatlarǵa bólindik hám men Gavayı atawlarında boldım. 3 hápte ishinde biz ámeliyatta boldıq hám bilimimizdi asırdıq. Bul ámeliyat arqalı men Amerika mádeniyatın bastan keshirdim, jańa jaylardı hám iri xalıqaralıq kompaniyalarda da, kishi bizneste qanday jumıs alıp barılıwın kórdim. Úlken biznes haqqında aytqanda, 70 jaslı isbilermendi oyda sáwlelendire alasızba?! Men Marsha atlı 70 jaslı óz biznesin júrgizetuǵın jaǵımlı hayal menen ushırasıw baxtına miyassar boldım. Tuwrısın aytsam, ámeliyatım ótken “THE WELLNESS CENTER FOR HEALTHY LIVING”, salamatlandırıw orayın basqarıp atırǵan bul gózzal hayal meni hám quwandırdı, hám tańlandırdı. Áyne sol jerde men Marsha xanım menen ushrastım, ol samolyot apatınan keyin ózi uzaq dawam etken medicinalıq emlewlerden ótken. Táwir bolıp ketkennen keyin, Marsha xanım dúzeliwge mútááj bolǵanlarǵa járdem beriw minnetlemesin aldı. Onıń orayında júdá kóp hár qıylı apparatlar bar bolıp, jası úlken bolıwına qaramastan, oray jumısların ózi basqaradı hám júrgizedi. Sonday kúshli hám unamlı hayaldıń iskerligin baqlawdan júdá kewilli boldım.
Awırıwlarǵa xızmet kórsetiwdiń pútkilley basqasha sistemasına iye «Kalihi Palama Health Center», «NIU Health», den -sawlıqtı saqlaw orayına da keldim. Mısal ushın, AQShta adamlar medicinalıq qamsızlandırıwǵa iye bolsa ǵana, medicinalıq járdem ala aladı. Men medicina salasınıń ayrıqsha táreplerin biliwge qızıqtım.
Áyne usınday joybarlarda qatnasıw maǵan ideyalarım hám ármanlarım ústinde islewdi dawam ettiriwim ushın ájayıp motivaciya beredi”, — deydi Juldız sayaxat tásirleri menen bólisip.
Biz Juldız Abatbayevanı shet elde jańa tájiriybe asırǵanı menen qutlıqlaymız hám regionımızdaǵı klimat ózgeriwine qarsı gúreske úles qosıwǵa járdem beretuǵın startap-joybarı ústinde islewdi dawam ettiriwine úmit etemiz. Biz Juldızǵa hárdayım ózine iseniwin jáne bul menen toqtap qalmawın tileymiz!