Meniń atım Fatima,ózimniń joybarım haqqında aytıp bermekshimen

Biz Ózbekstan Jaslar Awqamı hám UNICEF sherikliginde ótkerilgen «ImkonLab» joybarında toparımız benen qatnastıq.

ImkonLab  –  bul sociallıq innovaciyalar hám sociallıq isbilermenlik kónlikpelerin qáliplestiriwge qaratılǵan baǵdarlama.

Bul joybar birinshi márte qaraqalpaq jasları ushın pilot rejiminde tańlaw daǵazalaǵan edi(16 jastan 24 jas aralıǵinda). Bul tańlawda 10 topar tańlap alındı hám 10 kún dawamında biznes-trening shólkemlestirildi. Olardan 5 topar tóreshiler quramı juwmaǵına bola, finanslastırıldı hám bizde toparımız benen 1000 AQSH dollar grant alıwǵa eristik.

Biz bul joybarda «Eco bags» atı menen qatnastıq. Startap joybarımızdıń tiykarǵı maqseti – «xalıq arasında plastik paketlerden paydalanıwdı kemeytiw jolı arqalı, átirap-ortalıqtıń pataslanıwınıń aldın alıw». Házirgi kúnde eko-sumka hám eko-shopperlerdi buyırtpalar tiykarında tigip atırmız. Nókis hátte basqa shetki rayonlardan Shımbay hám Qanlıkól rayonlarınan da buyırtpalar boldı. Men oylayman sol startap joybarımız arqalı Qaraqalpaqstan xalqın eko-sumka hám eko-mádeniyatqa úyreta aldıq dep. Sebebi biz tigiw menen birgelikte agitaciya jumıslarında alıp barǵanbız!

Komandamız 3 qızdan ibarat. Joybar lideri hám tiykarshısı -Fatima Saparova.

Biz proektimizdi elede keńeytiw niyetimiz bar. Sebebi, joybardı ámelge asırıp baslaǵan waqtımızda eko-sumka ne? qanday materiyaldan tigiledi? ol qanday boladı? sıyaqlı sorawlar kóp ushırastı. Házir bolsa buyırtpalarımız sanı kúnnen-kúnge kóbeymekte. Hám taǵı sol startap joybarmızdı keńeytiw maqsetinde basqada grantlar hám konkurslarǵa tapsırıp, donorlar kómeginde 1,2 úskene alıw niyetimizde bar!

Joybarımızdı ámelge asırıwda jaqınnan járdem bergen mentorlarımızǵada óz minnetdarshılıǵımızdı bildiremiz! Olardan bizge úlken járdemler boldı.

Motivaciya retinde sonı aytıp ótpekshimen, biz sol startap joybarımızdı baslaǵanda júdá kóp unamsız pikirlerdi esitkenbiz hám házir de esitemiz! Qaraqalpaqstanda bul joybar ámelge asıwı qıyın, xalıq bunı túsinbeydi báribir, basqashalaw birnárse islewdiń ılájı joqpedi degen pikirlerdi kóp esitkenbiz. Biraq, biz toqtap qalmadıq, heshkimniń pikirlerine qaramastan tek aldıǵa háreketlenip, proektimizdi realizaciya qılıwdı dawam etkenbiz.

Eger sizde biznes-ideya bolıp, onı ámelge asırıw niyetińiz bolsa, aldıńızǵa anıq maqset qoyıń hám negativ pikirlerge itibar bermeń! Taǵı, biz sumkalardı tigip baslaǵan waqtımızda payda alıwdı emes bálki, sol joybarımız arqalı regionimiz ekologiyasına azǵana bolsada óz paydamız tiysin degenbiz, biz proekt basında payda almaǵanbız. Biz jaqınnan baslap paydaǵa shıqtıq. Maqsetimiz, xalıqtı eko-sumkalarǵa úyretiw hám átirap-ortalıqtı taza saqlaw.

Ózimizdiń tikken sumkalarımızdı kóshede yamasa basqa bir orında kórip qalsaq, shopperlar haqqında jıllı pikirler esitsek ish-ishimizden quwanamız. Óytkeni qansha qıynaldıq, qáte tiktik, qansha materiallar zaya boldı, barlıǵına bir jola erisip bolmaydı eken, hámmesi ásten-ásten  óz-ózinen ámelge asadı eken.

«ImkonLab» joybarı bizge haqıyqattanda haqıyqıy múmkinshilikler esigin ashıp berdi. Bunıń ushın UNICEF hám onıń jumısshısı Inna Wolfsonǵa hám mentorlarımızǵa óz minnetdarshılıǵımızdı bildiremiz. Aldımızǵa anıq maqsetlerimizdi belgilep alıp, oǵan erispegenshe artqa qaramawımız kerek!

Baylanıslar:

Telefon: +998913055758

Telegram: @eco_sumok @FatimaSaparova

Instagram: @eco_bags.nks