Jıl basında Ózbekstandaǵı BMSH Rawajlanıw Dástúri, Birlesken Milletler Shólkeminiń Xalıqtanıw fondı (UNFPA), Birlesken Milletler Shólkeminiń Azıq-awqat hám awıl xojalıǵı shólkemi (FAO) menen birgelikte, Ózbekstan Respublikası Ekonomikalıq rawajlanıw hám Kámbaǵallıqtı kemeytiw ministrligi menen sheriklikte hám Qaraqalpaqstan Respublikası Ministrler Kabineti «Aral teńizi regioniniń hálsiz bóleginde ekonomikalıq hám azıq-awqat qawipsizligi máselelerin sheshiw ushın adaptiv potencialın kúsheytiw arqalı dóretiwshilik hám innovaciyalıq intalı jaslardı hám hálsiz xalıqtı xoshametlew» jańa dástúrin iske túsirdi. Onı ámelge asırıwda finanslıq járdem, Aral teńizi regioni ushın insan qawipsizligi boyınsha, BMSHnıń kóp sheriklik isenim fondı tárepinen ámelge asırıladı.

Dástúrde Qaraqalpaqstandaǵı jas isbilermenlerdiń innovaciyalıq ideyaların qollap-quwatlaytuǵın jergilikli startap-inkubatorlar hám akseleratorlar jaratılıwı názerde tutılǵan. Jaslar isleri agentligi janında jaslar platformasın engiziw rejelestirilip atır, bul jerde bolajaq isbilermenlerdiń ózin-ózi kórsetiwleri hám startap-joybarlar tarawındaǵı kónlikpelerin rawajlandırıwı ushın barlıq zárúr shárt-shárayatlar támiyinlenedi.

70 ten artıq jaslar dástúrdi ámelge asırıw dawamında biznes -treningler, toparlıq hám individual mentorlıq, konsalting hám mentorlıq sessiyalarında qatnasıw múmkinshiligine iye boladı. Tájiriybeli mentorlar jaslar menen birge islesedi, olar biznes-ideyası payda bolǵan waqıttan baslap startap-joybarların jumısqa túsiriwge shekem dástúr qatnasıwshılarına járdem kórsetedi. Tańlaw tiykarında saylanǵan úsh startap joybardı ámelge asırıw ushın BMShRDnen qarjı aladı.