Ayımxan Afinova Qaraqalpaqstan medicina institutın tamamlaǵan, házirde N.I.Pirogova RMIMU filialında (Rossiya milliy izertlew medicina universiteti) “Balalar nevrologı” qánigeligi boyınsha ordinaturada oqıp atır.

Ayımxan studentlik jıllarınan baslap-aq social joybarlarda aktiv qatnasıp keledi. Birinshi tabıslı joybarlarınan biri Evropa Birlespesi tárepinen finanslastırılǵan hám ámelge asırılǵan Nókis qalasında velosporttı rawajlandırıw boyınsha “Cycling in Nukus ” joybarı bolıp tabıladı: 2020 -jılda IDEAfest2020 tańlawında 12 000 yevro grant utıp aldı.

Joybardı ámelge asırıw processinde 9 joqarı oqıw orınlarında velosipedshiler ushın qolaylıqlar jaratıldı, qalanıń basqa aymaqlarında velosiped toqtap turıw ornı hám velosiped remontlaw stansiyaları ornatıldı. Sol waqıtta Nókis qalasında dáslepki keń kólemli “Báhár veloparadı” ótkerildi, velosporttı keńeytiw maqsetinde túrli ilájlar, seminarlar, master-klasslar ótkerildi.

“Qatnasıwshılarımızǵa veloparad unadı, húkimetimiz wákilleri arasında salamat turmıs tárizine qızıǵıwshılar da bar ekenligi bizdi júdá quwantırdı,” – deydi Ayımxan 2021-jıl 2-aprel kúni Nókis qalasında bolıp ótken veloparad haqqındaǵı tásirleri menen bólisip.

“Velosiped aydaw maǵan uwayımsız balalıǵımdı eske saladı, sebebi men velosipedte tábiyat qoynında waqıt ótkeriwdi jaqsı kóretuǵın edim. Universitette oqıw jıllarında bir binadan ekinshisine ótiw “mashqalası” payda boldı. Túslik waqtında, yaǵnıy, asıǵıs saatlarda universitet qasında biypul mashina tabıw qıyın edi hám biz piyada júriwimiz, keyingi sabaqqa úlgeriwimiz ushın jolda tez-tez awqatlanıwımız kerek edi. Solay etip, qalamızda velosporttı rawajlandırıw, jaratıw ideyası tuwıldı”, – deydi Ayımxan.

Joybardıń tabıslı ámelge asırılıwı finanslıq járdem izlewde bir neshe jıllıq mashaqatlı miynetti talap etti.

“Birinshi tańlaw “StartUP инициативы” boldı, onda 2017-jılda men óz ideyamdı ilgeri súre basladım. Jeńimpazlıqtı qolǵa kirgize almaǵan bolsam da, bul jarısta qatnasıw men ushın úlken tájiriybe boldı. Sol waqıttan baslap barlıq tańlawlarǵa izbe-iz birdey joybardı usınıs ete basladım hám hár saparı joybardı túrli táreplerden joqarı dárejede jetilistirdim. Men óz ideyamdı qalay durıs usınıwdı, onıń ekologiyalıq, finanslıq jáne social abzallıqların kórsetiwdi úyrendim. Házirgi waqıtta Ózbekstan Respublikası Innovaciyalıq rawajlanıw ministrliginiń finanslıq járdemi menen joybar ústinde islewdi dawam ettirip atırman”, — deydi Ayımxan.

Ayımxannıń jáne bir jetiskenligi – “Солнечные дети” joybarı menen ImkonLAB tańlawında qatnasıp, 1000 dollar muǵdarında qarjıǵa iye bolǵan.

Biz jerlesimizdiń Nókis qalasında velosport mádeniyatın rawajlandırıw iskerligi, “Солнечные дети” jaqtı hám mehirli joybarı ústinde islep atirǵanınan maqtanamız. Kelesi joybarlarıńızda tabıslar tileymiz!

“Cycling in Nukus” joybarı jańalıqların Telegram kanalında baqlap barıń.