- 2007-jılda “Shuhrat” medalı menen sıylıqlanǵan.
- Ulıwma miynet stajı 38 jıl.
A.Naubetova jumıstıń kózin biletuǵın isbilermen hayal, qaraqalpaq kesteshilik kórkem ónerinde óz mektebine iye ónerment hám joqarı shólkemlestiriwshilik uqıbına iye isbilermen hayal retinde respublika kóleminde úlken abırayǵa iye.
Onıń shólkemlestiriwi menen xalıq ámeliy kórkem óneriniń tiykarın quraytuǵın qaraqalpaq milliy kesteshilik mektebi jaratılǵan.
Ol basshılıq etken kárxana milliy hám zamanagóy usıllarda kiyim-kenshekler, otawlar ushın (qara úy) gilemler, “beldew’”, “aq basqur”, “qızıl basqur”, “kerege tang’ısh”, “izba-dizbe”, “upshin”, “jan baw’” sıyaqlı materialların tayarlap kelmekte.
A.Naubetova búgingi kúnde 7 kisini turaqlı jumıs penen támiyinlegen.
Ol óziniń talapshańlıǵı, jańalıqlarǵa umtılıwı hám jumıs tájiriybesi menen hár jılı “Tashabbus” kórik tańlawında turaqlı túrde qatnasıp diplom hám qımbat bahalı sıylıqlar menen sıylıqlanıp kelmekte.
Atap aytqanda, «Tashabbus» tańlawınıń Qaraqalpaqstan Respublikası basqıshında 2002, 2004, 2005, 2006 hám 2008-jılları «Eń jaqsı isbilermen» jónelisi boyınsha ekinshi orındı, 2003-jılı «Eń jaqsı ónerment» jónelisi boyınsha ekinshi orındı hám 2007-jılı «Tashabbus» tańlawınıń laureatı iyesi bolǵan. Sonıń menen birge, hár jılı Marg’ilon qalasında ótkerilip kelinetuǵın “Atlas” bayramında múnásip qatnasıp sertifikat penen sıylıqlanǵan.
Sonıń menen birge, Qazaqstan Respublikası Alma-ata hám Atıraw qalalarında shólkemlestirilgen, Qazaqstan hám Orta Aziya qol ónermentleri sanaatı kórgizbelerinde óziniń islep shıǵarǵan milliy buyımları menen tabıslı qatnasıp, biziń mámleketimizdiń abırayın úlken shıńlarǵa kóterdi.
Házirgi waqıtta apamız perzentleriniń ózine uqsaǵan pidayı, Watanımız gúlleniwine múnásip úles qosatuǵın ónerment bolıwǵa, óz úlesin qosıp jáne de kóp tarmaqlı ónermentshilik ónimleriniń óndirisine járdem berip kiyatır.
A.Naubetova qızı R.Matirzaeva anasınıń kásibin dawam etip kiyatır. A.Naubetovanıń qızı R.Matirzaeva 2017-jılı «Tashabbus» kórik tańlawında tabıslı qatnasıp rayonımız abırayın kóterip kelmekte. Sonıń menen birge bıyılǵı jılda Ózbekstan Respublikası birinshi Prezidentiniń 80 jıllıǵına baǵıshlap ótkerilgen “Berdax” teatrında yarmarkada óz ónimleri menen qatnasıp jıynalǵanlarda ózgeshe tásirler qaldırıwǵa erisken.
Házirgi waqıtta A.Naubetovanıń basshılıǵında qol miyneti tiykarında islep shıǵarılǵan ónimler, Nókis qalasındaǵı “Sovetskiy” atındaǵı milliy muzey dúkanında, “Sáwkele” atlı milliy buyımlar dúkanında hám “Jipek joli” miymanxanası dúkanlarınan orın alǵan. Apamız A.Naubetova pensiyada pensioner bolıwına qaramastan qızına kómeklesip jumıslarınıń natiyjeliligin asırıwda miynet etip kiyatır.
A.Naubetova úsh shákirtti tayarlap óz kásibiniń sırların úyretip sheber ónermentler bolıp jetilisiwine óz úlesin qosıp atır.
A.Naubetova áyne waqıtta rayonımızda turizmniń rawajlanıwına da óz úlesin qosıp atır hám keleshekte sol tarawdı keń kólemde rawajlanıwın támiyinlew niyetinde.
Bıyılǵı jıldan baslap A.Naubetova Shomanay rayonı «Bántlikke kómeklesiw» orayı menen sheriklikte “Ónermentler” tayarlaw mektebin ashıp, úsh aylıq oqıw kursların shólkemlestiriw hám olardıń oqıw kursların pitkergennen keyin olarǵa tiyisli sertifikatlar berip, ónermentshilik iskerligin rawajlandırmaqta.
Bunnan tısqarı A.Naubetova usı waqıtta tábiyiy ónimlerden boyaw alıw texnologiyası ústinde islep atır.
A.Naubetova milliy lipaslardı qayta tiklew, en jaydırıw, isbilermenlikti qollap-quwatlawǵa hám rawajlandırıwǵa mámleketimiz tárepinen qaratılıp atırǵan itibar jáne onıń áhmiyeti haqqında rayon jasları ortasında sońǵı úsh jılda 24 márte úgit-násiyat jumısların alıp barǵan.
Uqıplı hám pidayı ónerment, kishipeyil hám hadal insan retinde el-jurt húrmetin qazanǵan.
Qaraqalpaqstan Respublikası, Shomanay rayonı.
